Kwiyamamaza mu matora yo gusimbura umudepite byasojwe ku cyumweru tariki 05/01/2020

Igikorwa cyo kwiyamamaza kw'abakandida depite cyaberaga mu Turere tugize Intara y'Amajyepfo cyasoje kuri iki cyumweru tariki 05/01/2020 mu Karere ka Kamonyi.

Iki gikorwa cyari cyatangiriye mu Murenge wa Gasaka mu Karere ka Nyamagabe,  tariki 18 Ukuboza 2019 cyari kimaze ibyumweru ahafi bitatu, abakandida biyamamaza ahari hateganyijwe guhurira n'inteko zitora. Muri buri Karere  k'Intara y'Amajyepfo hari hateganyijwe ahiyamamarizwa habiri (2), ari naho hahurizwaga abagize Inteko zitora baturutse mu Mirenge yegeranye.

Uko kwiyamamaza byagenze:

Muri rusange igikorwa cyo kwiyamamaza kw'abakandida depite mu Matora yo gusimbura uwari depite Nyirarukundo Ignatienne cyagenze neza. Abaturage bagize Inteko itora babonetse ku bwinshi, Ubuyobozi bw'Uturere bwagize iki gikorwa icyabo, bafasha mu gutegura ahiyamamarizwa, no gushishikariza abaturage kukitabira.  Nta mbogamizi zagaragaye, haba mu kubahiriza amategeko agenga kwiyamamaza, abakandida bagaragaje guhatana nta gukimbirana cyangwa kugaragaza amashyari ayo ariyo yose, babikoze mu buryo bwo koroherana,  buri mukandida agaragaza  imigabo n'imigambi ye, no gusaba amajwi yumvikanisha ko ari we ukwiye.

Umwe mu bakandida bemejwe na Komisiyo y'amatora ntiyiyamamaje

Ku bakandida depite cumi na bane (14) Komisiyo y'Igihugu y'Amatora yari yemeje,  umwe niwe ntiyitabiriye igikorwa cyo kwiyamamaza, uretse ko atanakuyemo kandidatire ye. Uwo ni madamu Ahobantegeye Charlotte.

Biteganyijwe ko amatora azaba kuwa gatatu tariki 08/01/2020, akazabera ku rwego rw'Akagari. Inteko itora igizwe na Komite Nyobozi y'Inama y'Igihugu y'Abagore kuva ku Mudugudu, Akagari, Umurenge, Akarere n'Intara, hiyongereyeho Inama njyanama y'Akarere hamwe n'Inama njyanama z'Imirenge yose igize Intara y'Amajyepfo.