Ibikorwa byo kwiyamamaza kw'abakandida senateri birakomeje mu Turere no muri za Kaminuza kandi biragenda neza hose mu gihugu


Abakandida senateri bo mu mashuri makuru na Kaminuza zigenga

Kuva tariki 27 Kanama 2019, abakandida senateri bemejwe n’Urukiko rw’Ikirenga batangiye kwiyamamaza mu Turere dutandukanye no muri za Kaminuza za Leta n’izigenga zitandukanye; iki gikorwa kikazarangira tariki 15/09/2019, saa kumi n’ebyiri za mugitondo. (6:00 a.m).

Hashize iminsi abakandida bose hamwe 63 barimo 58 bazitoreza mu ntara n’Umujyi wa Kigali, 2 biyamamariza muri Kaminuza za Leta, na 3 biyamamariza muri Kaminuza zigenga.

Kugeza ubu, haba mu bakandida biyamamariza mu Turere kimwe n’abiyamamariza muri za Kaminuza, Komisiyo y’igihugu y’amatora itangaza ko igikorwa cyo kwiyamamaza kirimo kugenda neza, abiyamamaza bakurikiza Amategeko n’Amabwiriza agenga iki gikorwa, abagize inteko itora nabo bitabirye ari benshi, kandi kwiyamamaza birakorwa mu mutuzo no  mu bwisanzure.

Biteganyijwe ko usibye umwanya wateguwe na Komisiyo y’Igihugu y’amatora ifatanyije n’inzego zitandukanye, abakandida bafite uburenganzira bwo kuba bahuza inteko zitora bakiyamamaza, bashobora kwiyamamaza kandi bakoresheje uburyo bundi bunyuranye, burimo kumanika ibitambaro cyangwa impapuro zibamamaza, gutanga inyandiko, gukoresha itangazamakuru, imbuga nkoranyambanga, n’ubundi buryo bwose butanyuranyije n’Itegeko.